Uhamba ngesisu obehlezi ethuka uKhuzani
YINTATHELI YENGEDE
USEHLANZA abekudle ngayizolo omunye wabalandeli abebedume kakhulu ngokuthuka uKhuzani “Indlamlenze” Mpungose, ezinkundleni zokuxhuma lapho abeshiya angalazi engakufihli nanokuthi umzonda kangakanani lomculi.
Kumangaze abalandeli abaningi ukubonakala nokuzwakala kukaSizwe Ndlovu odabuka esigodini saKwasijula, eMfekayi, eMtubatuba, enyakatho yeKwaZulu-Natal, esehamba ngesisu phansi exolisa ngazo zonke izinhlamba abethuka ngazo uKhuzani.
Phela le nsizwa yakwaNdlovu ibisifana nevuvuzela ebizwakala impongoloza ekuseni ivusa abantu ezinkundleni zokuxhumana iqhulula zonke izinhlamba ebivuka nazo ibhekise kulo mculi.
UNdlovu ubengakufihli ukuthi yena ungumlandeli wokuqina kaMthandeni “Igcokama Elisha” Manqele, okwaziwayo ukuthi akabhekani noKhuzani.
Bekuthi noma kukhona ingoma entsha kaKhuzani ephumile, kuzwakale ngaye umfo kaNdlovu eyibeka amabala egxeka maqede aphelezela inkulumo yakhe ngentululwane yamagama anenhlamba.
Kuthe noma ingoma kaKhuzani isihlukanise unyaka emsakazweni kwaba yilensizwa yakwaNdlovu eyayigijima kuzona zonke izinkundla zokuxhumana icokofula itshela abantu ukuthi kayikho leyo ngoma eqokiwe.
Kwenye yezinkulumo zayo yagadla kanzima ithuka lomculi waseMandaba, eNkandla, imbhanqa nabaphathi bomsakazo uKhozi FM ngoba ithi bathengiwe ukuze bakhwabanise amavoti ngoba befuna kunqobe uKhuzani.
Kuthiwa nalapho obekusuke kuhlangene khona abalandeli bomculo kamaskandi, umfo kaNdlovu ubekhuluma aze ame ngobhozo akhiphe olude ulimi ehlohla abalandeli ukuba bazonde uKhuzani.
Emavikini edlule abaningi kabakholwanga ngesikhathi bezwa le nsizwa isikhuluma okwehlukile njengomhedeni osephendukile wamukela izwi leNkosi.
Iqhubekile yaqopha nesiqeshana sama video yawafaka ezinkundleni lapho ibizilahla khona ixolisa kuKhuzani nakubona bonke abalandeli bakhe ngezinkulumo ezinohlevane ebisidume ngazo imethuka.
Izolo kweminye yemisakazo iphindile lensizwa yahamba ngesisu phansi ishweleza ikhala ngokuthi unembeza wayo uyayilahla ngkukuthuka Indlamlenze.
“Ngithanda ukuthatha leli thuba ngizicelele intethelelo kuKhuzani Mpungose ngokumethuka nangokumdelela.
“Bengihamba phambili ngokuhlasela lomculi kodwa ekugcineni ngibonile ukuthi lento yokumthuka mina ayingisizi ngalutho kunalokho ingidalele amazondo kulabo abamthandayo.
“Empeleni ngifuna ukuba yisibonelo esihle sokuqeda indaba yokuthukwa kwabaculi emculweni kamaskandi,” kusho le nsizwa emsakazweni.
Ithi iyazisola ngoba ibuthuka umuntu eyayingakaze ixabane nanaye kodwa lokho ibikwenza ngoba yona izitshela ukuthi ifuna ukumjivaza ngayo yonke indlela.
“Kuyimanje nginesifiso esikhulu sokuhlangana naye uKhuzani ukuze ngizozixolisela mina bukhoma kuye ngoba lento ebengiyenza ibingalungile ngako ngifuna ukuzilahla ngiyoxolisa.
“Ngiyafuna futhi ukwedlulisa kuwona wonke amabhinca esilandela nawo umculo ukuthi masehlukane nomkhuba wokuthuka abaculi ngoba lento kayisizuzisi lutho.
“Konke engake ngakusho okubi ngoKhuzani ngiyakuhoxisa futhi ngeke ngisazwakala ngikhuluma okubi ngaye,” kuphetha le nsizwa emsakazweni.
Okhulumela abalandeli bakaKhuzani kuzwelonke, uMvumeleni Zwane, usishayele ihlombe isenzo sokuhlambuluka esenziwe yilomlandeni.
Ekhuluma neNGEDE, uZwane uthi besingabaphathi kahle isenzo sokuthukwa komculi wabo engenze lutho.
“Ngiyasithanda isenzo sakhe umfo kaNdlovu sokuxolisa futhi siyasamukela ngaphandle kwemibandela.
“Singabalandeli bakaKhuzani siyakwamukela ukuxolisa kwakhe futhi sengathi nabanye abenza okufanayo bengakuyeka lokhu.
“Nakithina bakhona abakwenzayo engifisa sengathi nabo bangathatha lesi sibonelo ngoba ekugcineni lento ingcolisa negama lomculi yize esuke engahlangene nezinkulumo zabalandeli.
“Ngicabanga ukuthi lento ingaqeda nezingxabano zabalandeli esihlezi sizibona zibakhona, futhi lokhu kungabuyisa nesithunzi emculweni kamaskandi.
“Njengabantu abahola abalandeli nathi sizobagqugquzela abethu ukuba bakwemukele ukuxolisa kwale nsizwa ngoba kuyinto enhle okufanele siyikhuthaze nakwabanye,” kuphetha uZwane.
